Publisert 8. oktober 2015 kl. 10:25
– Vi fekk ingen midlar til forskingsformidling og deltaking i Cristin, slik vi håpa, seier Liv Ramskjær. Foto: Unn Bjørge
– Museumsforbundet er nøgd med at fleire museum får midlar til bygg, bygningsvern og formidlingstiltak. Men den generelle auken i tilskottet på 1,7-1,9 prosent er ikkje nok til å gje musea nødvendig kompensasjon for pris- og lønnsutviklinga, seier generalsekretær i Museumsforbundet Liv Ramskjær.
(Sjå alle musea som får midlar i tabellen nederst i artikkelen.)
Ikkje spor etter Cristin
Ho seier Museumsforbundet også hadde vona på stimuleringsmidlar, slik at museum under Kulturdepartementet kan bli innlemma i forskingsinformasjonssystemet Cristin.
– For at musea skal bli del av Cristin, treng vi såkalla «teljekantpengar». Vi har spelt inn til Kulturdepartementet at det må setjast av fem millionar i stimuleringsmidlar til dette i 2016. Men dette har vi ikkje sett spor av i budsjettet, seier Ramskjær.
For lite pengar
Tendensen frå i fjor med ikkje å gje musea reell kompensasjon for pris- og lønnsvekst ser ut til å halde fram. I perioden sidan 2002 har prisomrekninga lege mellom 3,0 og 4,4 prosent og var på 3,4 så seint som i 2014. Mange museum er bekymra for at tilskottet frå kommunar og fylkeskommunar skal bli redusert tilsvarande. Med den foreslegne auken i kulturmomsen frå åtte til ti prosent, kan dette bety at det vil bli dyrare å gå på museum i åra som kjem, ifølgje Museumsforbundet.
Pengar til bygg
Ei rekkje museum har i framlegget fått tilskott til bygg, bygningsvern og utstillingstiltak. Samla tilskott for nasjonale kulturbygg i 2016 er 244,4 millionar. Blant dei nye prosjekta som får pengar er båthallen ved Norsk Maritimt Museum på Bygdøy, nye utstillingar i Norges Olympiske museum ved Lillehammer museum, utstilling ved Norsk Luftfartsmuseum i Bodø og nybygg ved Nordlandsmuseet for jekta «Anna Karoline». Dampskipet «D/S Hestmanden» ved Vest-Agder-museet får også pengar til restaurering. Elles får Dalane folkemuseum midlar til nytt vitensenter i Jøssingfjord, og Musea i Sør-Trondelag får pengar til Sverresborg byavdeling. Jærmuseet si avdeling Vitengarden på Hå har fått midlar til nytt magasin og formidlingsbygg.
Sett over fleire år, er tilskottsramma til byggeprosjekt ved nasjonale kulturbygg på 1012,2 millionar kroner.
Sjå alle kulturbygga som får midlar frå Kulturdepartementet i tabellen under:
